.png)
كتير من الناس اللي عندهم مشروع تجاري بيحتاج يعمل بطاقة ضريبية للمشروع بتاعه والبطاقة الضريبية دي تعني التسجيل برقم ضريبي كممول ضريبي لدى مصلحة الضرائب المصرية .
والتسجيل الضريبي بيكون مهم لأنه اول خطوات الحصول على شهادة مزاولة التجارة من الغرفة التجارية المختصة ، وكمان هو اول خطوة في سبيل الحصول على السجل التجاري وكمان الحصول على رخصة المشروع .
طب ازاي أسجل في الضرايب واحصل على البطاقة الضريبية ؟؟؟؟؟
المستندات :
1- صورة بطاقة الرقم القومي للمول او صاحب النشاط + الأصل للاطلاع
2- صورة عقد ايجار المحل أو المكان المقام فيه المشروع + الأصل للاطلاع ولازم عقد الايجار يكون واخد اثبات تاريخ في الشهر العقاري 👈👈👈👈 نموذج عقد ايجار
3- طلب فتح ملف ضريبي او تسجيل ضريبي وده بيختلف حسب نوع نشاط المشروع و بيكون في المصلحة او بتشتريه من اقرب مكتبة جنب المصلحة
ملحوظة 1 : خلي بالك ان تاريخ بداية عقد الايجار اللي مكتوب في العقد هو ده اللي بتبدأ على أساسه المحاسبة الضريبية ، وهو اللي على أساسه كمان بتبدأ التأمينات في محاسبتك ، فطالما سجلت ضريبياً يبقى لازم تعمل ملف تأميني ، لأن فيه تكامل بين التأمينات والضرايب ، ولو ما روحتش متقلقش هم كده كده هيبعتولك 😅😅😅😅😅😅😅😅وهيحاسبوك على اللي فات كله باثر رجعي .
فنصيحة روح لهم انت وابدأ بدل ما تلاقي عليك مبلغ كبير متراكم عليك وهتدفع يعني هتدفع.
ملحوظة 2 : لو مدة عقد الإيجار أقل من من 5 سنوات فتاريخ نهاية عقد الايجار هيكون هو تاريخ نهاية الرخصة
الاجراءات :
هتروح المصلحة ومعاك الورق المطلوب وبيفتحولك ملف وبياخد رقم ، وبيناقشوك كده في شوية حاجات زي رأس المال كام ، والايراد اليومي كام ، وهامش الربح كام وعنوان النشاط فين وحدوده ، وبعدين تاخد الملف الورقي لقسم المعلومات لقيد الملف الكترونيا وتقديم طلب الحصول على بطاقة ضريبية الكترونية ، وبعدين بتدفع مبلغ تحت حساب المحاسبة الضريبية وبيكون في حدود من 50 ل 200 جنيه وبتاخد وثيقة مختومة بختم الشعار اسمها وثيقة بيانات ضريبية لممول ودي بتكون معاك بتستخدمها زيها زي البطاقة الضريبية لغاية البطاقة الالكترونية ما تنطبع ودي بتاخد مدة من اسبوع ل 10 أيام عمل تقريبا ، ولاحظ الوثيقة دي بتستخدم في جهات كتير ، وبعد اسبوعين من تاريخ الاجراءات اللي فاتت دي كلها هترجع للمصلحة وتستلم البطاقة الضريبية الالكترونية
ومبروك عليك البطاقة الضريبية 👌👌👌
بس خلي بالك ان قيمة رأس المال اللي هتثبته في السجل الضريبي بتاعك هو نفسه اللي هتثبته في الغرفة التجارية والسجل التجاري واتحاد الصناعات لو كان المشروع متعلق بالتصنيع .
ملحوظة : هذا المقال لغرض التوعية القانونية بشكل عام حول هذا الموضوع ولا يغني عن استشارة محامٍ في موضوعك أنت تحديدا.
خاتمة واستشارة قانونية:
إن الإلمام بقواعد العمل أمام القضاء وصيانة العقود والأوراق القضائية يتطلب دقة شديدة وعلماُ بالإجراءات والمواعيد .
في مكتب الأستاذ محمد إسماعيل منصور المحامي بالاستئناف العالي ومجلس الدولة / ماجستير القانون العام ، نتولى عنكم كافة الإجراءات ومتابعة القضايا لضمان استرداد حقوقكم في أسرع وقت.
للتواصل والاستفسار:
هاتف أو واتساب
: 00201090765411